Ru
Sibir pişiyinin mənşəyi və tarixi
Sibir pişiklərin yayılması 16 əsrdə Rusiyanın Sibir bölgəsinin tədqiqatı ilə əlaqəlidir. Bu cinsin yaranması ilə bağlı mübahisələr davam edir. Bəzi mütəxəssislər sibir pişiklərinin əcdadı olaraq avropa meşə pişiklərini görür, digərləri isə onların fars pişikləri ilə əlaqəli olmasını iddia edirlər.
Çox zaman sibir pişiklərinin tarixində buxara pişiklərinə rast gəlmək olar. Buxara pişikləri Orta Asiya şəhərinin adını daşıyır. Orta asiyalı tacirlər bu pişikləri Sibir və Ural ərazisinə özləri ilə gətirmişdilər. Bir müddət sonra buxara pişikləri yerli tayqa pişikləri ilə cütləşərək yeni pişik cinsinin yaranmasına səbəb oldular. Ortaya çıxan pişiklər daha güclü və ağır hava və həyat şəraitlərinə daha dözümlü idilər. Vaxti ilə Sibirin hər bir evində bu pişiklər var idi. Onların yaşadığı evlər uzun müddətə kiçik heyvanlardan azad olunurdu.
Cinsin seleksiyası üzrə aktiv işlər isə 20 əsrin 80-ci illərində başlanmışdır.
Maraqlıdır: Əvvəldən cinsin adı “moskva pişiyi” kimi nəzədə tutulmuşdur.
Sibir pişiyinin standartı 1991 ildə Beynəlxalq Pişik Federasiyası (WCF/World Cat Federation) tərəfindən təsdiq olunmuşdur.
Sibir pişiyinin təsviri
Sibir pişiyi öz əzəmətli duruşu və zərifliyi ilə diqqət çəkir. Onun ən gözə çarpan üstünlüklərindən biri möhtəşəm tükləridir. Bu cinsin digər pişik cinsləri ilə cütləşdirməsi tövsiyə olunmur. Sibir pişiyinin görkəmi meyn kun və norvec meşə pişiklərinə bənzəyir. Sibir pişiyi meyn kun cinsindən fərqli olaraq daha yuvarlaq üz və bədən cizgilərinə və daha kiçik ölçülərə sahibdir. Meyn kun daha sərt və əzələli bədən quruluşuna malikdir.
Sibir pişiyi adi pişikdən fərqləndirən xüsusiyyətlər bunlardır: əzəmətli ölçü, uzun və gözəl tükləri, yuvarlaq jabo (tüklü yaxalıq) və tüklü şalvar formasında ayaqlar.
Cinsin standartına birlikdə nəzər salaq.
Sibir pişiyinin fiziki xüsusiyyətləri
- Sibir pişiyinin bədəni
Bədən quruluşu mütənasibdir. Bədəni orta uzunluqdadır, əzələləri yaxşı inkişaf etmişdir, kürəkdə olan bir qədər əyrilik çiyinlərdən bir qədər hündürdür. Qarnı boçkaşəkillidir. Sinəsi həcmlidir.
- Sibir pişiyinin baş və kəlləsi
Ölçüsü orta və ya böyükdür, bədənə mütənasibdir, alnından ağıza hamar bir keçid (stop) ilə trapesiya yaradır. Ağzı yuvarlaqlaşdırılmışdır və qısadır. Yanaq sümükləri yaxşı inkişaf etmişdir, çənəsi nəzərə çarpır. Boynu yuvarlaqlaşdırılmışdır, əzələlərli yaxşı inkişaf etmişdir.
- Sibir pişiyinin gözləri
Orta boy, demək olar ki, ovaldır, geniş yerləşibdir. Gözün xarici küncü bir az qulağın əsasına doğru yönəldilmişdir. Gözlərin rəngi tük rəngindən asılı deyil. Kolor-point rənginə məxsus mavi gözlər istisnadır. Göz rəngi yaşıl və ya sarı ola bilər.
- Sibir pişiyinin ayaqları
Orta uzunluqda, əzələli və güclü sümüklüdür. Arxa ayaqları öndən bir qədər uzundur. Pəncələri böyük və yuvarlaqdır, barmaqlarının arası tüklüdür.
- Sibir pişiyinin quyruğu
Orta uzunluqdadır, bədəndən qısadır. Əsası enlidir, ucuna doğru daralır. Tükü bərabər şəkildə uzanır. Pişiyin quyruğu yenot ya şimal tülküsünün quyruqlarına bənzəyir. Qışda quyruğun üzərindəki tüklər həcmdə artır.
- Sibir pişiyinin qulaqları
Orta boydadır, əsası enlidir və bir qədər irəli əyilibdir. Qulaqların arxasındakı tük daha qısa və incədir. Qulaq seyvanındaki tüklər uzundur. Qulağın ucunda fırçaların olması safqanlığın əlamətlərindən biridir.
- Sibir pişiyinin tükü
Sibir pişiyinin tükləri onun fərqləndirici xüsusiyyətlərindən biridir. Bu ev pişiyinin tükü qalın, nazik alt tük örtüyündən və sərt xarici tük örtüyündən ibarətdir. Kürək sümüklərində və sinədən aşağıda tük qalın və bir qədər qısa olmalıdır. Tekstura rəngdən asılı olaraq dəyişə bilər. Sibir pişiyinin tükləri su keçirməzdir. Bununla onlar tarixən soyuq iqlimdə qorunurdular. Qış aylarında pişikdə gözəl qalın yaxalıq (jabo) uzanır, arxa ayaqları və quyruğu daha qalın tük ilə örtülür. Tüklü yaxalığı norvec meşə pişiyinin üçbucaqlı yaxalığından fərqli olaraq daha yuvarlaq formadadır. Yayın istisində isə sibir pişiklərinin tük örtüyü azalır.
- Sibir pişiyinin rəngləri
Sibir pişiyinin rəngləti fərqli ola bilər. Pişiyin rəngi 2 tip melanin növü ilə əlaqəlidir. Melanin qara və ya qırmızı rəng əmələ gətirə bilər. Digər rənglər isə bi 2 rəngin kombinasiyaları nəticəsində yaranır.
Sibir pişikləri bu rənglərdə ola bilər: birrəngli, tebbi, himalay, bikolor (ikirəngli), tısbağa, tüstülü və s. Cins standartlarına əsasən siam kolor point rəngi (bu rəng neva maskarad cinsinə məxsusdur) çıxmaq şərtilə qalan digər rənglərin birləşmələri qəbul olunur. Ən çox rast gəlinən tabbi rəngidir. Bu halda hər tükdə tünd və açıq sahələr sıra ilə dəyişir.
Bala sibir pişiyi necə seçilməli
Təcrübəli yetişdiricilər, sağlam və safqanlı bala sibir pişiyini seçmək üçün aşağıdaki tövsiyələri verirlər:
- Cinsin standart (yuxarıdaki abzasda) və özəllikləri ilə öncədən tanış olun.
- Qətiyyən iki ayına çatmamış bala sibir pişiyini almayın.
- Müxtəlif sərgilərdə iştirak edərək, sibir pişiyinin yetişdiriciləri barədə məlumatlar əldə edin.
- Aktiv və həyatsevən bala pişiyə üstünlük verin. Bu xüsusiyyətlər onun sağlamlığının və düzgün inkişafının əlamətidir.
- Bala sibir pişiyinin çəkisinə diqqət edin. Həmçinin onun gözlərini, qulaqlarını yoxlayın və dəri ilə tük vəziyyətini dəyərləndirin. Sağlam bala pişikdə heç bir axıntılar olmamalıdır.
- İmkan daxilində bala sibir pişiyinin valideynlərini də nəzərdən keçirin.
- Bütün lazım olan sənədlərin (heyvan pasportu, peyvəndə dair və s.) olmasına xüsusilə diqqət edin.
- Zərərvericilərə qarşı profilaktik təqdbirlərin görülüb görülməməsi barədə məlumat əldə edin.
Sibir pişiyi haqqında maraqlı məlumatlar
Fakt 1
Sibir pişiyi “dünyanın TOP 10 ən iri pişik cinsi”reytinqində yer almışdır.
Fakt 2
Sibir pişiklərində bəzi it xüsusiyyətləri izlənilir.
Fakt 3
Sibir pişiklərin tam yetişməsi 3-5 yaşında başa çatır.
Fakt 4
Sibir pişiyində valideynlik instinkti çox güclüdür. Erkək pişik də həmçinin bala pişiklərinin qulluğuna qala bilər.
Fakt 5
Sibir pişiyinin kolor-point (siam) rəngi “neva maskarad pişiyi” adlanan yeni bir cinsin yaranmasına səbəb oldu.
Fakt 6
Sibir pişikləri suyu və üzməyi çox sevir.
Fakt 7
Sibir pişikləri çox danışandır. Onlar müxtəlif tembr və intonasiyalar ilə ünsiyyət qurur.
Fakt 8
Uzun tüklərinə baxmayaraq sibir pişikləri hipoallergen cinslərə aiddir (xüsusən dişi pişiklər).
Fakt 9
Sibir pişiyi hündür yerləri çox sevir.
Fakt 10
Sibir pişiyi mükəmməl ovçudur. Onun yaşadığı yerdə heç bir gəmiricilərə yer olmaz.
Sibir pişiyinin xasiyyəti
Böyük ləyaqət, dözümlülük və əzəmətli bu gözəl pişiklər ilk təəssüratın heç də aldadıcı olmadığını sübut edirlər. Sibir pişiyinin görünüşü bu cinsin təbiətinə tam uyğundur. Şirin üz ifadəsi müstəqil xarakter ilə ahəngdar şəkildə birləşərək bu təmkinli ev pişiyini mükəmməl dərəcədə təsvir edir.
Cins mehribanlığı ilə seçilir və sahibinə çox sadiqdir. O, öz insanının bütün gündəlik işlərində iştirak etməyə çalışır və quyruq kimi onun ardınca gəzir. Sibir pişiyi sizi evdə qarşılayacaqdır və dizinizin üstündə uzanıb sizinlə melodik miyovlama ilə danışacaqdır. Lakin sahibinin əhval-ruhiyyədə olmadığını o an hiss edir və həddindən artıq diqqət ilə onu narahat etmir.
Sibirlilər top gətirməyi, hündür yerlərə tullanmağı və hətta suda oynamağı sevən və olduqca oynaq pişiklərdir. Bu, sadəcə istədiklərini əldə etmək üçün hər hansı bir problemi həll etməyə çalışacaq çox ağıllı bir cinsdir. Sibir pişiyi bağlı qapıları heç xoşlamır. Arxanızca qapını bağlayarkən, siz ona bir meydan oxuyursuz. O, qapını açmaq üçün əldə gələni edəcəkdir. Böyük zəka və oynaq xasiyyəti təşviq etmək üçün belə bir ev pişiyi üçün müxtəlif oyuncaqlar almaq məsləhət görülür. Qeyd edək ki, bu pişiklər hündürlüyü sevənlərdir. Onlar hər zaman yüksəklikdə bir yer axtarır və ordan öz mülkünü seyr edir. Caynaqyonan formasında oyun kompleksi onun ürəyincə olacaq. Sibir pişiyi həm də pəncərəyə baxaraq ,quşları, piyadaları izləməyi sevir. Bu səbəbdən pəncərələrin təhlükəsiz olmasını təmin edin.
Sibirlilərin ovçu instinktləri bəzən digər pişiklərlə davaya səbəb ola bilər. Bununla onlar öz sahələrini müdafiyə edirlər. Mütəxəssislər sibir pişiklərlərdə və itlərdə oxşar cəhədlərin olmasını vurğulayır. Sibirlilər də, itlər kimi, sahiblərinə çox bağlı və sadiq olur, güclü qoruma xüsusiyyətlərinə malik olur və rahatlıqla təlim olunurlar. Onların zəka səviyyəsi yüksəkdir.
Sibir pişiyinin ailə və uşaqlarla münasibəti
Sibir pişiyi çox yaxşı kompanyon heyvandır. Ailə üçün çox əlverişli pişik cinsidir. Siz onları rahatlıqla bağ evinizə də apara bilərsiz, mühitin dəyişməsi onları stressə salmır.
Pişik uşaqlarla yaxşı yola gedir və onlarla yaxşı dost olacaqdır. Onun oynaq xasiyyəti uşaqlarla xoş vaxt keçirməyi təmin edir. Eyni zamanda unutmayın ki, uşaqlar ev pişiyi ilə düzgün davranmağı bilməlidirlər. Əks halda, pişik, onu incidən uşağı cırmaqlaya da bilər.
Yad insanlara qarşı ev pişiyi etibarsızlıq hiss edir, lakin heç vaxt aqressiya nümayiş etmir.
Sibir pişiklərinin digər heyvanlarla münasibəti
Güclü təbiətlərinə görə sibirlilər digər ev heyvanlarına qarşı dominantlıq nümayiş edə bilərlər. Quşlar və gəmiricilər kimi kiçik heyvanlar ilə diqqətli olmalısınız. İtlərlə neytral münasibət qururlar. Lakin digər pişiklərlə münasibət daha qəlizdir. Əgər sibir pişiyi körpəlikdən digər pişiklə birlikdə böyüyübsə, münasibətləri yaxşı olacaqdır. Lakin evə yeni pişiyin gəlməsi sibir pişiyinizdə rəqabət hissini oyadacaqdır. Ev quşları, gəmiricilər və digər kişik ev heyvanları ilə də ehtiyyatlı olmaq lazımdır, çünki pu pişiklərin ovçu instinkti çox güclüdür.
Sibir pişiyinin müsbət və mənfi cəhədləri
Bu pişik cinsinin populyarlıq qazanması heç də təsadüfi deyil. O, bir sıra danmaz üstünlüklərə malikdir, məsələn:
- əzəmətli görünüşü, xüsusi ilə də möhtəşəm kürkü
- təmizliyə olan sevgisi
- yüksək zəka səviyyəsi və bundan irəli gələn yüksək öyrənmə qabiliyyəti
- güclü ovçuluq instinkti, hansı ki, evinizi və hətta ətraf sahələri siçanlar və digər gəmiricilərdən azad edəcəkdir
- allergiya yaratmayan tüklər (xüsusilə dişilərə aiddir)
- pəhləvan sağlamlığı və uzun ömürlüyü (müvafiq qulluq olunması şərtilə)
- yeməkdə seçici olmaması. Bu hal, sibir pişiyinin gündəlik rasionunun tərtib etməsini asanlaşdıracaqdır
Müsbət cəhədlərin uzun siyahısına baxmayaraq, sibir pişiyində təbii ki, bəzi xoşagəlməz cəhədlər də müvcuddur:
- azadlıq və qürur hissi (pişik mütləq incidənindən intiqamını alacaq, onunla münasibətdə yetərincə hörmət nümayiş edin)
- ildə 2 dəfə tüləməsi və bu dövrdə tüklərə daha əsaslı qulluq etməsinin vacibliyi
- gəzintiləri və aktivliyinin dəstəyini tələb edir
Sibir pişiyinin saxlanması və təlimi
Təbiət bu pişiklərə böyük dözümlülük bəxş etmişdir, buna görə də onlar həm şəhər mühitində, həm də şəhərdən kənar şəraitdə yaşaya bilirlər. Cinsin böyük ölçüsü və oynaqlığını nəzərə alsaq, sibirlilər rahat həyat üçün böyük bir sahəyə ehtiyac duyurlar. Öz sahəsi olan həyət evi pişiyi gəzintiyə buraxmaq üçün ideal bir fürsət olacaqdır. Əgər pişiyinizi mənzildə saxlayırsınızsa, onun üçün xüsusi xalta qayışı ilə gəzintilər təşkil edin. Xalta qayışsız gəzintilər onun qaçması ilə nəticələnə bilər, çünki sibirlilər azadlıqsevərdir.
Sibir pişiyi çox ağıllı bir cinsdir, buna görə də onun təlim prosesi asan keçməlidir. Evə gəldiyi ilk gündən pişiyi tualet və caynaqyonan ilə tanış edin. Sibirlərin ən təmizkar pişik olduqlarını nəzərə alsaq, tualet təlimi ilə bağlı heç bir problem olmamalıdır. Bala pişiyi necə düzgün tualet təlimi etməli barədə daha ətraflı məqaləmizdə oxuya bilərsiniz.
Sonra, ev heyvanınıza hansı düzgün davranışı başa salın. Müsbət təlim metoduna əməl edin – sözünüzə baxdığı üçün ev heyvanınızı dadlı çərəz ilə mükafatlandırın və oxşadın, lakin heç vaxt ona qışqırmayın və ya danlamayın. Çətin hallarda qəzəbinizi sərt bir tonla ifadə edə və ya pişiyi "olmaz" sözünə alışdıra bilərsiniz.
Yetkin pişiyin təlimi daha çox vaxt və səbr tələb edəcəkdir, lakin nəticə sizi mütləq sevindirəcəkdir.
Sibir pişiyinin yemlənməsi
Ev pişiyinin qidalanmasına böyük məsuliyyət ilə yanaşmaq lazımdır. Vitaminlərin və yağ turşularının ən kiçik çatışmazlığı belə birbaşa ev heyvanının tükünə təsir göstərir. Sibir pişiyinin rasionu yağlar, zülallar, kalori və karbohidratlar üzrə balanslaşdırılmalıdır. Belə sağlam rasion super-premium və xolistik pişik yemləri ilə təmin olunur. Bunlara Monge, Royal Canin, Acana, Orijen yem brendləri aiddir.
Uzuntüklü sibirlilər üçün pişik yemi, tük və dərinin gözəllik və sağlamlığının dəstəkləyən EPA və DHA yağ turşuları ehtiva etməlidir. Bu yağ turşuların mənbəyi isə qiymətli balıq növləridir (siyənək, qızılbalıq, alabalıq, ton balığı və s.). Həmçinin sümüklər və dişlərin sağlamlığı üçün yemdə kalsium və fosforun olması da bir şərtdir.
Rasion seçərkən cinsin mədədə tük topalarının yaranmasına meyilliliyini də nəzərə almaq lazımdır. Bu tip pişik yemi (məsələn, Royal Canin pişik yemləri) faydalı liflər və prebiyotiklər ehtiva edir. Bu inqrediyentlər, tük topalarının təbii yolla çıxmasını təmin edirlər. Tük topalarını çıxaran yemlərlə yanaşı xüsusi malt pastalar da mövcuddur.
Pişiyin təbii yemlənməsi konseptini dəstəkləyən sahiblər üçün xüsusi Acana və Orijen pişik yemlərini qeyd edə bilərik. Onlar rekord miqdarda 90%-dək ət inqrediyentləri ehtiva edir və pişiyin bioloji əsaslı yemlənmə prinsiplərini dəstəkləyir.
Ev pişiyini yalnız təbii qida ilə bəsləmək istəyirsinizsə, cinsin bütün qida ehtiyaclarını nəzərə alan düzgün rasion hazırlamaq üçün baytar həkiminə müraciət edin.
Ev pişiyini heç vaxt öz süfrənizdən bəsləməyin. Pişiyi həmişə təmiz içməli su ilə təmin edir. Lakin nəzərə alın ki, sibir pişiyi , vəhşi əcdadları kimi də yemək yediyi yerdə suyunu içmir. Bunun üçün də yem və su qablarını bir az aralı məsafədə yerləşdirməyiniz gərəkdir.
Sibir pişiyinə qulluq və gigiyena
Sibir pişiyinə düzgün və mərhələli qulluğu əsirgəməyin. Pişiyə düzgün qulluq, ona, keyfiyyətli həyat səviyyəsi və möhkəm sağlamlıq bəxş edəcəkdir. Sibir pişiyinə qulluq və gigiyena bunları ehtiva edir:
- çimizdirmə və tüklərə qulluq
- zərərvericilərə qarşı profilaktik emal işi
- caynaq kəsimi
- ağız boşluğuna qulluq
- göz və qulaqlara qulluq
Sibir pişiyin çimizdirməsi və tüklərinə qulluq (daranma)
Sibir pişikləri çox təmizkardır, lakin onlar təkbaşına böyük həcmdə olan tüklərin öhdəsindən gələ bilmirlər. Qayğıkeş sahibi onun tüklərini həftədə 2-3 dəfə xüsusi uzun və sıx tüklər üçün olan daraq ilə daramalıdır. Payız və yaz fəslində, yəni tüləmə dövrlərində isə daranma gündəlik rituala çevrilməlidir. Bu zaman adi daraqdan yanaşı xüsusi alt tüklər üçün daraqdan da istifadə olunmalıdır.
Sibir pişiyi suyu sevsə də, onu, yarım ildə bir dəfə xüsusi uzun tüklü pişiklər üçün şampunla çimizdirmək lazımdır. Tüklərini və ayaqlarını çirkləndiribsə, onları xüsusi salfetlərlə təmizləyə bilərsiz. Tüklər üçün xüsusi kondisioner barədə də unutmayın ki, sibir pişiyin tükləri daim yumşaq, ipək və dolaşıqsız olsun. Dolaşıq tükləri isə ehtiyyatlı şəkildə barmaqlarınızla bir-bir açmalısınız.
Zərərvericilərə qarşı emal tədbirləri (bit, birə, gənə, qurd və s.)
Sibir pişiklərin uzun tükləri zərərvericilərin (parazitlərin) aşkar olmasına mane olur. Pişiyiniz çöldə gəzməsə də, bu vacib qulluq etapından vaz keçməyin. Zərərvericilərin yumurtaları bizi bir çox yerdə gözləyirlər (ayaqqabı dabanları, pənəcərəaltıları və s.). Parazitlərə istənilən zaman yoluxmaq olar. Sibir pişiyinin bit, birə, gənə qarşı emal olunması isti fəsillərdə (martdan oktyabra-dək) ayda bir dəfə xüsusi dərmanlar vasitəsi ilə həyata keçirilməlidir.
Qurda qarşı emal olunması isə (pişik çiy ət yemirsə və çölə çıxmırsa) ildə iki dəfə xüsusi qurd dərmanları ilə baş tutmalıdır.
Sibir pişiyinin dırnaqlarının (caynaqlarının) kəsilməsi
Altı ayına çatmamış bala sibir pişiklərin dırnaqları həftədə 1 dəfə xüsusi qayçı ilə kəsilməlidir, lakin yetkin pişiklərdə bu prosedur iki həftədən bir həyata keçirilməlidir. Dırnaqlarını kəsərkən pişiyinizlə mülayim danışın və onu rahatlaşdırmağa çalışın. Prosedurdan sonra sibir pişiyinizi dadlı çərəzlə mükafatlandıra bilərsiz. Calışın ki, caynağın həssas hissəsinə toxunmayasız, o nahiyədən bir sıra sinirlər və damarlar keçir. Dırnağın yalnız üst hissəsi kəsilməlidir.
Sibir pişiyinin ağız boşluğuna qulluq
Sibir pişiklərin ağız boşluğu xəstəliklərinə meyilli olduqlarını nəzərə alaraq ağız və dişlərinin gigiyenasına xüsusilə diqqət edilməlidir. Dişlərin təmizlənməsi üçün xüsusi məcunlar və fırçalardan istifadə olunmalıdır. Sibir pişiyiniz nəm yem rasionu ilə qidalanırsa, xüsusi stomatoloji çərəzlərdən də istifadə etmək məsləhət görülür.
Sibir pişiyinin göz və qulaqlarına qulluq
Sibir pişiklərin qulaqları və gözlərində heç bir axıntı olmamalıdır. İfrazatlar bir sıra xəstəliklərin əlamətidir. Həftədə bir dəfə pişiyin qulaqları xüsusi vasitələrlə toplanmış kirlərdən təmizlənməlidir. Qulaq gigiyenasına laqeyd yanaşma, qulaq gənəsi, karlıq, qulaq təzyiqi kimi fəsadlar ilə nəticələnə bilər.
Sibir pişiklərin göz gigiyenası da həmçinin çox vacibdir. Göz dibində toplanmış kirlər mütəmadi olaraq təmizlənməlidir. Zəif göz gigiyenası konyuktivit və digər problemlərə səbəb ola bilər.
Göz və qulaq üçün təmizləyici vasitələrin çeşidləri ilə pişiklər üçün baytalıq aptek bölməmizdə tanış ola bilərsiniz.
Sibir pişiyinin sağlamlığı və xəstəlikləri
Sibir pişiyi güclü immunitetə sahib olan çox dözümlü bir cinsdir. Düzgün qayğı ilə onlar 20 yaşa qədər yaşaya bilirlər. Sibir pişiklərin əsas sağlamlıq problemləri onların genetikasından irəli gəlir.
Sibir pişiklərində ən rast gəlinən xəstəliklər bunlardır:
- Böyrək və sidik ifrazatı ilə bağlı
Geniş yayılmış sidik daşı xəstəliyi sidikdə qan və sidiyin ifraz etməsi zamanı ağrılarla təsvir olunur. Böyrək polikistozu isə sidik ifrazatı problemləri, çəkinin və iştahın azalması, susuzluq kimi simptomlarla aşkar olunur.
- Hipertrofik miopatiya
Bu xəstəlik, ürək divarının qalınlaşmasına səbəb olur. Bu xəstəlik KT zamanı aşkar olunur. Xəstəliyin müalicəsi xüsusi rasion (məsələn, yemişanla zəngin) və koaqulyantların qəbulunu nəzərdə tutur.
- Onkologiya (adətən safqanlı və ağ rəngdə olan sibir pişiklərdə rast gəlinir).
- Ağız boşluğu xəstəlikləri
Bunlara parodontoz aiddir, hansı ki, sibir pişiyinin həmin xəstəliyə meyilli olan digər cinslərlə (fars, meyn kun) cütləşməsi nəticəsində genetik yolla ötürülür.
- Mədə-bağırsaq traktının problemləri (məsələn, tük topaların yaranması).
Xəstəliyi gec olmamış aşkar etmək üçün baytar həkiminə vaxtı vaxtında müraciyət etməyiniz vacibdir.
Sibir pişiyinin vaksinasiyası
Vaksinasiya yetkin və ya bala sibir pişiyinin tam sağlam olması şərtilə həyata keçirilir.
Bala pişiyi infeksiyalardan qoruyan ilk peyvənd 3 ayına yaxın vurulur. Lakin bu peyvəndə quduzluğa qarşı peyvənd daxil deyil. Növbəti peyvənd bir aydan sonra təkrar vurulur və quduzluq peyvəndini ehtiva edir. Sibir pişiyin 1 yaşından sonra təkrar quduzluğa qarşı peyvənd vurulur. Bir sıra xəstəliklərə qarşı olan polivaksin isə bala sişir pişiyin üç ay tamamında vurulur.
Sibir pişiklərin illik vaksinasiyası onların sağlamlığının gücləndirilməsi üçün çox vacibdir.
