Ru
Yorkşir teryer (Yorkshire terrier) haqqında məlumat
İncəlik və dözümlülük, mehribanlıq və hakimlik, sədaqət və müstəqillik – bir-birinə zidd bu xüsusiyyətlər bu miniatür itdə inanılmaz dərəcədə birləşir. Yorkshire terrier dünyada ən məşhur itlərdən biri titulunun qazanması heç də təəccüblü deyil. İstər uşaqlı ailələr, istərsə də tənha yaşlılar, bu şən və enerjili it, demək olar ki, hər kəs üçün əla bir yoldaş olacaqdır.
Yorkşir teryerinin xasiyyəti
Yorkşir teryer itinin temperamenti onun xarici görünüşündən tamamilə fərqlidir. O, özünü evin yiyəsi, sahibinin müdafiəsini isə özünün əsas borcu olaraq hesab edəcək. Axı onun damarlarında əsl ovçu qanı axır.
Düzgün təlim olunduqda yorkşir öz sahibinin həyat tərzinə yaxşı uyğunlaşır. Yorkşirlər çox aktiv və hər şeyə maraq göstərən itlərdir, buna görə də uşaqlı ailələr üçün uyğundurlar. Lakin belə bir incə heyvanı təsadüfən zədələməmək üçün uşaqlar onunla necə davranmağı bilməlidirlər. Yad uşaqlar və böyüklərə qarşı ehtiyatla yanaşır.Bu cins evdəki digər heyvanlarla yaxşı yola gedir, lakin yad heyvanlarla münasibətdə dominantlıq göstərə bilir.
Yorkşir teryerinin fiziki xüsusiyyətləri
- Bədəni
Bədəni ahəngdar, mütənasib quruluşa malikdir. Beli qısadır, forması isə horizontaldır. Süysün hündürlüyu krup hündürlüyünə bərabərdir. Əzələləri inkişaf etmişdir, lakin bədən quruluşu incədir.
- Baş və kəlləsi
Başı kiçikdir, kəllə qapağı yastıdır, burunu isə bir az uzundur.
- Gözləri
Orta boy gözləri oval və ya badamşəkillidir. Düz yerləşib və parıltılıdır.
- Ayaqları
Ön ayaqlarının quruluşu düzdür. Dirsək sümükləri çıxmır. Arxa ayaqları arxadan düz görünür, yan tərəfdən isə cüzi əyilmə nəzərə çarpır. Ayaqları yuvarlaqdır. Barmaqları bükülüb. Caynaqları qara rəngdədir.
- Quyruğu
Qalın tüklə örtülüb. Adətən quyruq tükünün rəngi bədəndən daha tünd olur.
- Qulaqları
Qulaqları kiçik və düzdür, bir-birinə yaxın yerləşir. Onlar açıq qızılı rəngdə qısa tük ilə örtülüb və V şəkilli formaya malikdir.
- Tükü
Yorkshire terrier itinin uzun və yumşaq tükü strukturuna görə insan saçına bənzəyir. Alt tük örtüyü yoxdur. O həyatı boyu uzanır və yalnız darama zamanı və ya mexaniki zədə aldıqda tökülür. Gündəlik şəkildə darama və həftədə ən azı 1 dəfə olaraq çimizdirmə tələb edir. Bunun üçün tükü həddindən artıq rütubətdən qoruyacaq və təbii gözəlliyinin qorunmasına kömək edəcək xüsusi şampun mükəmməl olacaqdır.
- Rəngi
Yetkin cins iki standart rəngdə olur: Mavi-tünd və ya mavi-polad bədən, qızılı və ya qırmızımtıl-qızılı baş və ayaqlar, tünd polad rəngli quyruq. Tünd polad bədəni və quyruğu, qırmızımtıl-qəhvəyi və ya sarı-qəhvəyi rəngli baş və ayaqlar.
Yorkşir teryeri üçün qulluq və qayğı
- Yemlənməsi
Yorkşir dekorativ cins olduğundan həyat üçün vacib olan bütün qida maddələri ilə kiçik porsiyalarda təmin edilməlidir. Rasionun yarıdan çoxunu heyvan mənşəli məhsullar təşkil etməlidir. Cinsin yaşından asılı olaraq bütün bəslənmə nüansları xüsusi olaraq yorkşir teryer üçün Royal Canin Yorkshire terrier yemlərində nəzərə alınır. Yemin eksklüziv formulu itin tük örtüyünün sağlamlığının və gözəlliyinin qorunmasına kömək edir. Sağlamlığı ilə bağlı problemlərin yaranmaması üçün təbii qida və hazır yemi heç vaxt qarışdırmayın. İti öz süfrənizdən bəsləməyin.
- Təlimi
Yorkşir teryer orta səviyyədən yuxarı zəkaya sahib ağıllı bir cinsdir, buna görə də təlimlə bağlı problemlər yaranmamalıdır. Tərbiyə etməyə çox erkən yaşlarından başlamaq və iti tədricən sosiallaşdırmaq, onu müxtəlif insanlar, yerlər və səslər ilə tanış etmək daha yaxşıdır. İnadkar və müstəqil xasiyyətinə görə təliminə yorkshire terrier daha çox vaxt gedə bilər. Buna görə də səbirli olun və müsbət yanaşma metoduna əməl edin. Yaxşı davranışı dadlı çərəzlər ilə təşviq edin, yanlış hərəkətlərin isə sərt tonla qabağını alın. İtin mehriban və sakit xasiyyətli böyüməsi üçün heç bir halda ona qarşı fiziki cəza və aqressiya tətbiq etməyin.
- Sağlamlığı
Yorkşir terye) itində ya anadangəlmə, ya da sonradan yaranmış xəstəliklər ola bilər. Ona görə də ev heyvanlarının sağlamlığına erkən yaşdan nəzarət etmək vacibdir. Doğuşdan 4 aya qədər bu itlər hipoqlikemiya (qanda şəkərin sürətlə azalması) kimi xəstəliklə üzləşə bilərlər. Bala itdə yuxuluq, gücsüzlük və qıc olma müşahidə oluna bilər. Bu halda bədən temperaturu azaldığına görə it komaya düşə bilər. Bu əlamətlər aşkar olunarsa, dərhal yorkshire terrier diş ətinə bal sürtün və onu təcili baytar həkiminə aparın.
Sümüklərin kövrək quruluşu səbəbindən yorkşir teryer iti diz qapaqlarının çıxmasına meyllidirlər, buna görə də hündürlükdən tullanmaqdan çəkinmək lazımdır. Oynaqların digər xəstəliyi Pertes xəstəliyi adlanır. Yaşı 5-10 aylıq olan itlərə toxunan irsi xəstəlikdir. Xəstəliyin klinik əlamətlərinə axsaqlıq, ağrı və diskomfort daxildir.Yorkşirlərdə tez-tez diş problemləri yaranır. Onlar diş ərpinin yaranmasına meyllidirlər ki, bu da diş çürüməsinə gətirib çıxarır. Bunun qarşısını almaq üçün itin dişlərini müntəzəm olaraq fırçalayın və stomatoloji çərəzlərdən istifadə edin.
Görmə orqanları tərəfindən yorkshire terrier torlu qişanın qopmasına meyllidirlər. Xəstəlik genişlənmiş göz bəbəyi, göz dibinin boz rəngdə parıldaması və toran vaxtı görmə qabiliyyətinin zəifləməsi ilə özünü büruzə verir.Bütün kiçik cinslər kimi, yorkşir teryer də tez-tez nəfəs yolunun kollapsından (dağılmasından) əziyyət çəkirlər. Bu vəziyyətdə nəfəs almaqda kəskin çətinlik yaranır. Əksər hallarda bu, xaltadan istifadə nəticəsində yaranmış nəfəs yolunun yumşalması səbəbindən baş verir. Bu cür halın qarşısını almaq üçün sinə qayışına üstünlük verin. Qeyd etmək lazımdır ki, york kiçik ölçülü (karlik) cins nümayəndəsi olaraq tez-tez stress halına düşə bilir. Bu hal titrəmə (tremor) və ya kontrolsuz sidik ifrazı kimi özünü biruzə verə biləcəkdir. Məhz bu səbədən york ilə münasibətdə daha diqqətli, mülayim və qayğıkeş olmalısınız.
