Sterilizasiya olunmuş it üçün yem seçimi

Sterilizasiya/qısırlaşdırma proseduru itin həyatında mühüm mərhələ hesab olunur. İlk baxışdan göründüyü qədər qorxulu prosedur deyil. O, itin davranışını daha sakit edir. Ən əsası isə dişi itlərdə süd vəziləri, uşaqlıq və yumurtalıq xərçəngi, erkək itlərdə isə prostat və xayaların şişlərinin yaranma riskini azaldır. Bundan əlavə, ərazi nişanlama problemi də aradan qaldırılır. Sterilizasiyadan sonra ev heyvanına düzgün qulluq etmək çox vacibdir. Buraya tikişlərin işlənməsi, rahat istirahət şəraitinin yaradılması və yemin dəyişdirilməsi daxildir. Rasionun dəyişdirilməsi itin orqanizmində baş verən hormonal dəyişikliklərlə əlaqədardır. Sterilizasiya olunmuş it adətən daha az hərəkətli olur. Hormonal fonun dəyişməsi səbəbindən o, aktiv oyunlardan daha çox rahat yataqda dincəlməyə üstünlük verir. Passiv həyat tərzi maddələr mübadiləsini yavaşladır və artıq çəkiyə səbəb ola bilər. Hər əlavə kiloqram ürəyə, oynaqlara və sümüklərə əlavə yük yaradır. Bundan başqa, piylənmə şəkərli diabet riskini də artırır. Bu fəsadların qarşısını almaq üçün itin fiziki aktivliyinə diqqət yetirin. Məsələn, birlikdə maraqlı və faydalı oyunlar oynamaq üçün it oyuncaqları əldə edə bilərsiniz.

Sterilizasiya olunmuş it üçün yem necə olmalıdır?

Steril itlər üçün yem daha az kalorili olmalı və yüksək həzm olunan heyvani zülal mənbələri ilə balanslaşdırılmalıdır. Buna görə də mütəxəssislər qısırlaşdırılmış iti əvvəlki adi yemlə qidalandırmağı tövsiyə etmirlər. Gəlin sterilizasiya olunmuş it yemlərinin tərkibini daha ətraflı nəzərdən keçirək.

Sterilizasiya olunmuş it üçün yemin kaloriliyi

Steri itlər üçün optimal enerji dəyəri orta hesabla 100 qram yemdə 320–370 kkal təşkil edir. Kalorinin azaldılması düzgün şəkildə həyata keçirilməlidir. Məsələn, zülalın azaldılması əzələ kütləsinin itirilməsinə və itin zəifləməsinə səbəb ola bilər. Məhz buna görə belə yemlərdə kalorilik əsasən yağ miqdarının azaldılması hesabına təmin edilir. Bundan əlavə, maddələr mübadiləsini sürətləndirən L-karnitin və toxluq hissini artıran komponentlər də əlavə olunmalıdır.

Əzələlərin qorunması və tam dəyərli qidalanma üçün zülallar

Sterilizasiya olunmuş it üçün yemin tərkibində yüksək keyfiyyətli ət mənbələri olmalıdır. Əla seçimlərdən biri kastrasiya edilmiş itlər üçün xüsusi seriyaya malik Royal Canin it yemləri olacaq. Bu yemlər xüsusi patentləşdirilmiş L.I.P. zülalları ilə zəngindir. Onlar daha yaxşı mənimsənilir və həzm sisteminə əlavə yük yaratmır. Bu dövrdə itin əzələ kütləsini qorumaq xüsusilə vacibdir. Əzələlər orqanizmdə kalorinin əsas istehlakçısıdır. Buna görə kifayət qədər əzələ kütləsi gündəlik enerji sərfiyyatının normal səviyyədə qalmasına kömək edir.

Sterilizasiya olunmuş itin yeməyində yağ və lif miqdarı

Yağlar orqanizm üçün faydalı olsa da, yemin kaloriliyini əhəmiyyətli dərəcədə artırır. Mütəxəssislər yağ miqdarını orta hesabla 8–10%-ə, yaxud əvvəlki yemlə müqayisədə 10–12% azaltmağı tövsiyə edirlər. Lakin qısırlaşdırmadan sonra itin iştahının arta biləcəyini də nəzərə almaq lazımdır. Buna görə yemin tərkibinə müxtəlif lif mənbələri əlavə edilir. Lif bağırsaqda şişərək toxluq hissi yaradır və beyinə doyma siqnalı göndərir.

Sterilizasiya olunmuş it üçün yem onun xüsusiyyətlərinə uyğun necə seçilməlidir?

Yem seçərkən itin ölçüsünü nəzərə almaq vacibdir. Çünki kiçik, orta və iri cins itlərin maddələr mübadiləsi, oynaqlara düşən yük və digər fizioloji xüsusiyyətləri fərqlənir.

Sterilizasiya olunmuş kiçik cins it yemləri

Kiçik cins sterilizasiya olunmuş it yemləri onların artıq çəkiyə meyilli olması, sürətli metabolizmi, həssas həzm sistemi və kiçik çənə quruluşu nəzərə alınaraq hazırlanır. Belə yemlər bitki lifi, prebiyotiklər və asan həzm olunan heyvan mənşəli zülallar ehtiva etməlidir. Qranullar isə kiçik çənələrə uyğun ölçüdə olmalıdır. Yaxşı seçimlərdən biri Royal Canin Mini Sterilised yemidir.

Sterilizasiya olunmuş orta və böyük cins it yemləri

Orta və böyük cins qısırlaşdırılmış it yemi yüksək keyfiyyətli və yaxşı mənimsənilən zülal ehtiva etməlidir. Bundan əlavə, tərkibində xondroprotektorlar və minerallar olmalıdır ki, oynaqların, sümüklərin və qığırdaqların sağlamlığını dəstəkləsin. İri cins itlərdə artıq çəki dayaq-hərəkət sisteminə ciddi yük yaradır. Buna görə onların rasionunda prebiyotiklər, lif və maddələr mübadiləsini aktivləşdirən komponentlərin olması vacibdir.

Sterilizasiyadan sonra müalicəvi yem nə zaman lazım ola bilər?

Qeyd edildiyi kimi, steril it üçün yemlər artıq çəkinin və sidik yolları problemlərinin profilaktikasına kömək edir. Lakin bu problemlər artıq yaranıbsa, itlər üçün müalicəvi yemlər istifadə oluna bilər. Əgər it qısırlaşdırmadan sonra kökəlirsə, baytar həkimlər adətən Light Weight və ya Obesity seriyasından olan müalicəvi yemləri tövsiyə edirlər. Lakin bu yemlər sterilizasiya olunmuş it üçün yemin alternativi hesab edilmir. Onların kaloriliyi çox aşağıdır və əsas məqsədi artıq çəkinin kəskin azaldılmasıdır. Eyni qayda Urinary seriyasına da aiddir. Bu yemlər steril itlər üçün nəzərdə tutulan gündəlik yemlərdən fərqlidir. Tərkibində minimum maqnezium və sidik daşı əmələ gəlməsində iştirak edən mineralların ciddi şəkildə məhdudlaşdırılmış miqdarı mövcuddur.

Vacib: Müalicəvi yemə keçid yalnız baytar həkimin nəzarəti altında həyata keçirilməlidir.

 

İti sterilizasiya olunmuş it üçün yemə necə keçirmək olar?

Sterilizasiya olunmuş it üçün yemə keçid tədricən aparılmalıdır. Əks halda stres, kəskin həzm pozğunluğu və ya yemdən imtina ilə qarşılaşa bilərsiniz. Yeni yemə keçid adətən 7–10 gün davam edir. Bu proses haqqında daha ətraflı məlumatı yeni yemə keçid qaydaları məqaləmizdə oxuya bilərsiniz. Əgər yeni yemə keçid zamanı güclü həzm problemləri və ya itin ümumi vəziyyətində pisləşmə müşahidə olunarsa, mütləq baytar həkimə müraciət edin.

Sterilizə olunmuş it üçün gündəlik yem norması adətən əvvəlki fizioloji normadan 10–30% az olur. Bununla belə, ən doğru göstərici istehsalçının qablaşdırmada qeyd etdiyi qidalanma cədvəlidir.

Rasionun dəyişdirilməsi ilə yanaşı, itin kifayət qədər su qəbul etməsinə də diqqət yetirmək lazımdır. Yetərli maye qəbulu sidik yolları xəstəliklərinin yaranma riskini azaldır. Əgər it az su içirsə, ona steril itlər üçün nəm yem verməyi də sınaya bilərsiniz.

Bundan başqa, steril itin rasionunu dəyişərkən müxtəlif it çərəzlərinin miqdarını da məhdudlaşdırmaq tövsiyə olunur. Əgər iti təbii qida ilə bəsləmək istəyirsinizsə, menyunu baytar həkimlə birlikdə hazırlamağınız məqsədəuyğundur.

Xülasə

  Sterilizasiyadan sonra itə yalnız xüsusi qulluq deyil, həm də yeni qidalanma rejiminə mərhələli keçid lazımdır. Yeni rasion qısırlaşdırma nəticəsində orqanizmdə baş verən dəyişikliklər nəzərə alınaraq hazırlanır. Prosedurdan sonra maddələr mübadiləsi orta hesabla 15–20% yavaşlayır, fiziki aktivlik də həmçinin azalır. Bu da artıq piy toxumasının yığılmasına səbəb ola bilər. Sterilizasiya olunmuş it yemləri elə balanslaşdırılır ki, artıq çəkinin və sidik daşı xəstəliyinin qarşısını almağa kömək etsin. Yem seçərkən qablaşdırmadakı yazılara deyil, ilk növbədə onun real tərkibinə diqqət yetirin.

  Düzgün balanslaşdırılmış sterilizə olunmuş it yemi sevimli dostunuzun sağlamlığını qorumağa və ona uzun, xoşbəxt ömür bəxş etməyə kömək edəcək.