Ev heyvanı ilə Yeni İl bayramı: təhlükəsizlik tədbirlərinin görülməsi

Ev heyvanı ilə keçirilən Yeni İl bayramı sizə sirk tamaşasını xatırlatmır? Parlaq rənglər, zərli bəzəklər və ləzzətli yeməklər kiçik dostumuzun ağlını başından alır, biz isə təlimçi kimi onu sakitləşdirməyə çalışırıq. Bu şən qaça-qaçda diqqətimizi bir an yayındırsaq ev heyvanımızın başına fəlakət gələ bilər. Bayram günlərini baytarlıq klinikasında keçirmək istəmiriksə, o zaman təhlükəsizlik tədbirlərini görməliyik.

Bayram bəzəkləri

Evinizi bayram üçün bəzəyərkən ev heyvanınızın təhlükəsizliyini nəzərə alın. Şam ağacı bəzəkləri, elektrik çələnglər, zər və hətta ağacın özü (təbii olsa belə) heyvan həyatı üçün potensial təhlükə daşıyır.
 

Yolka bəzəklərini seçərkən tutqun rəngli və qırılmaz plastik olanlara üstünlük verin. Parlaq toplar quyruqlu dostumuzun diqqətini çəkəcək və şüşədən olsalar heyvan onları qırıb özunu yaralaya bilər.
 

Elektrik çələng yanıb-sönən olarsa, pişiklərin və gəmiricilərin hədəfinə çevriləcəkdir. Naqilləri dişləri ilə sınayan ev heyvanı elektrik çarpması və ən yaxşı halda yanma riski ilə üz-üzədir. Çələngləri hündürdən asın ki, ev heyvanı onlara çata bilməsin; məftilləri isə gizlədin.
 

Zər və ya yağış bəzəklər təhlükəsiz görünsələr belə heyvan onları udduğu halda bağırsaq zədələnməsinə səbəb olurlar. Nəticədə balaca dostunuz iştahasını itirir, qusur və zəifləyir. Belə halda heyvan dərhal baytarlıq klinikasına aparılmalıdır.
 

Təbii şam ağacı iynələrinin tərkibində bağırsağı və ağzı qıcıqlandıran yağlar və qatranlar vardır. Böyük miqdarda şam iynələrini yemək pişik və itlərdə qusma və ishala səbəb ola bilər. Bundan əlavə, tikanlar süni ağac olsa belə, heyvanın mədə-bağırsaq traktını deşə bilərlər. Buna görə də, ev heyvanının sağlamlığında ən kiçik bir xoşagəlməz dəyişiklik görsəniz, dərhal həkimə müraciət edin.

Yolkanı xilas edirik

Pişiklər Yeni İl simvoluna xüsusi maraq göstərirlər. Yolkanı ev heyvanlarının əlindən qurtarmaq üçün sahibləri nələr etmirlər. Kimsə pişiklərin sevmədiyi portağal qoxusundan istifadə edir. Kimsə pişiklərin hamar, xışıltılı səthlərə dözmədiyinə inanaraq ağacın qarşısında folqa sərir. Bəziləri isə şam ağacı və oyuncaqlara tərgitdirici sprey tətbiq edirlər.
 

Bu tədbirlər təsir etməzsə, aşağıdakı üsullara müraciət edin. İlk olaraq ağacın yerləşdiyi yerə diqqət yetirilməlidir. O, bir küncdə və mebeldən uzaq yerləşdirilməlidir ki, pişik üzərinə asanlıqla dırmaşa bilməsin. Ağacı yerində sabitləyin ki, möhkəm dayansın. Bəziləri yolkanı divara bərkidir və ya başını tavana bağlayır.
 

Aşağı budaqları bəzəmək və zərdən istifadə etmək məsləhət görülmür.
 

İndi isə kiçik dostumuzda Yeni İl şam ağacı ilə xoşagəlməz assosiasiyalar yaratmalıyıq. Pişiyin hər dəfə yolkaya yaxınlaşması yüksək səslərlə müşayiət olunmalıdır. Ağacın yanında tozsoran və ya saçqurudan qoyub onları hər dəfə qoşmaq olar. Siz həmçinin yüksək səslə əl çala və sərt tonda “Olmaz!” deyə bilərsiniz. Hətta qaşıqla qazan çalmaq və ya tütəkli oyuncaqlardan istifadə etmək olar. Bəzilərinə pişiyi pulverizatordan su ilə çiləmək kömək edir.

Bayram süfrəsi

Ev heyvanımızla Yeni İl bayramı zamanı xoşagəlməz anlarla qarşılaşmamaq üçün onun qidalanmasına nəzarət etmək vacibdir. Gündəlik yemləmə rejimini pozmayın.
 

Bayram zamanı bir çox ev heyvanının baytarlıq klinikasına düşməsinin səbəbi məhz həddindən artıq yeməkdir. Bu xüsusi gündə ev heyvanınıza ləzzətli hədiyyə etmək istəyirsinizsə, onu dadlı çərəzlər ilə sevindirin və ya inanılmaz dərəcədə ləzzətli Applaws topperlər ilə sevdiyi yeminə yeni dad qatın.
 

Qonaqları xəbərdar edin ki, heyvanı süfrədən bəsləməsinlər. Kiçik dostunuzun vəziyyətini izləyin ki, lazım olduqda onu vaxtında baytar həkiminə apara biləsiniz. Unutmayın ki, hər hansı hisə verilmiş məhsul, turşu və şirniyyatlar ev heyvanları üçün zərərlidir.

Qonaqların gəlişi

Evə yad insanların gəlməsi kiçik dostumuz üçün əlavə stresdir. Qonaqlarla əvvəlcədən danışın və onlara, xüsusən də uşaqlara, heyvanla davranış qaydalarını izah edin. Ev heyvanınıza gizlənə və dincələ biləcəyi sakit bir künc ayırın.
 

Bu zaman dörd ayaqlı dostunuzun qaçmaması üçün pəncərə və qapılara xüsusi diqqət yetirmək çox vacibdir.

Atəşfəşanlıq və digər pirotexniki vasitələr

Yeni İl atəşfəşanlığı ev heyvanlarında nevrotik vəziyyətlərə və fobiyalara səbəb ola biləcək güclü stres yaradır. Atəşfəşanlıq zamanı pərdələri bağlayın və heyvanı sakit yerə aparın. Stres zamanı sakitləşdirici vasitələrdən istifadə edə bilərsiniz. 
 

Ev heyvanı ilə birlikdə pirotexniki vasitələr buraxmaq son dərəcə arzuolunmazdır: güclü şok heyvanlarda tez-tez ürək parçalanmasına səbəb olur.
 

İt ilə gəzmək üçün sakit bir yer seçin. Çox vaxt fişənglərin partlaması nəticəsində itlər qorxaraq xalta qayışından çıxıb qaçırlar. Dörd ayaqlı dostunuzu həmişəlik itirməmək üçün üzərinə əlaqə məlumatlarınız olan bir etiket asın. 

Ev heyvanları adi Yeni İl bayramı əlləşmələrini unudulmaz anlara çevirirlər. Bayramların yalnız xoş xatirələrlə dolu olması üçün sadəcə olaraq kiçik dostlarımıza qarşı daha diqqətli olmalıyıq.